Қазақстан ветеринариялық қауіпсіздік саласында Германия тәжірибесін меңгеруде
Қазақстандық делегация Германияда Герман-қазақстандық аграрлық-саяси диалогтың қолдауымен ұйымдастырылған оқу-ақпараттық турға қатысты. Сапардың мақсаты – жануарлар денсаулығын сақтау, эпизоотиялық бақылау және ветеринариялық қызметті ұйымдастыру бойынша Германияның озық тәжірибесін зерделеу.
Бағдарлама 23 маусымда Германияның Азық-түлік және ауыл шаруашылығы федералды министрлігіне сапармен басталды. Елдің бас ветеринариялық дәрігері, доктор Катарина Клуге федералдық органдар нормативтік-құқықтық актілерді әзірлеп, олардың орындалуын өңірлік құрылымдар жүзеге асыратын басқару моделін таныстырды. Оның айтуынша, аурулармен күрес шараларына жеке ветеринар дәрігерлер де белсенді түрде тартылып отырады.
Қазақстандық делегацияны Германияның эпизоотиялық тұрақтылықты қамтамасыз етудегі кешенді тәсілі ерекше қызықтырды. Бұл жүйенің негізінде нақты заңнамалық база, мониторинг пен диагностика жүйесінің дамуы, ауыл шаруашылығы және жабайы жануарлардың жағдайына тұрақты бақылау, ветеринариялық және санитариялық бақылауды біріктіру және қауіпті аурулардың таралуына жедел әрекет ету тетіктері сияқты элементтер жатыр.
Неміс моделіне сәйкес, аса қауіпті ауруларға бақылау федералды деңгейде жүргізілсе, ал қауіптілігі төмен аурулардың алдын алу жұмыстары фермерлер мен жеке ветеринарлардың міндетіне жатады.
Германияда мал шаруашылығында антибиотиктерді қолдануды қысқартуға айрықша көңіл бөлінеді. Елде ветеринариялық дәрі-дәрмектердің айналымын бақылау жүйесі жұмыс істейді және олардың қолданылуын кезең-кезеңімен қысқарту шаралары енгізілуде. Бұл шараларға фермерлермен түсіндіру жұмыстарын жүргізу және баламалы емдеу әдістерін дамыту жатады.
Сапар аясында сауда мәселелері де талқыланды. Герман тарапы Қазақстан енгізген жануар тектес өнімдерді экспорттауға уақытша шектеулерді қайта қарауды ұсынды.
Сондай-ақ, Еуропалық Одақтан Қазақстанға тірі мал жеткізу перспективалары сөз болды. Қазіргі таңда Германия сүтті мал басын ЕО-дан тыс жерлерге экспорттауға мүдделі емес, себебі ұзақ тасымалдау жануарлар денсаулығына теріс әсер етуі мүмкін. Осыған байланысты, Болгария аумағында арнайы карантин аймағын құру мәселесі қарастырылып жатыр. Бұл ЕО-дан Қазақстанға тасымалданатын малға қатысты барлық ветеринариялық және санитариялық талаптардың сақталуын қамтамасыз етуге мүмкіндік береді.
Кездесу барысында қазақстандық өнімдерді Еуропалық Одаққа экспорттаудың кеңею мүмкіндіктері де қаралды. 2025 жылғы наурыздан бастап Қазақстан табиғи бал және ара шаруашылығы өнімдерін ЕО-ға экспорттауға рұқсат етілген елдер тізіміне енгізілді. Бұған дейін балық өнімдерін жеткізу туралы хаттамаға қол қойылған, аквакультура өнімдері бойынша келіссөздер жүргізілуде. Ал 2026 жылы қымыз етін экспорттау мәселесін талқылау жоспарланған.
Сапар барысында алынған білім мен тәжірибе Қазақстанның ветеринариялық жүйесін одан әрі дамытуда ұлттық ерекшеліктер мен халықаралық стандарттарды ескере отырып қолданылатын болады.
Пікір қалдыру:
Пікірлер: