Алматылық екі компания «Іскер» сыйлығын алды
«Алтын сапа» Президенттік сыйлығы мен «Қазақстанның үздік тауарлары» байқауының салтанатты рәсімі аясында «Іскер» сыйлығының иегерлері де марапаттарын алды.
2022 жылы 10 компания «Іскер» арнайы сыйлығымен марапатталды, олардың ішінде алматылық компаниялар – «Med365» ЖШС (жасанды интеллект көмегімен медициналық тексерудің автоматтандырылған жүйесін өндіру) және «Ланчжоу Компани» ЖШС (мейрамханалар желісі және тез тамақтану өнімдері).
«Іскер» сыйлығы Қазақстан Президентінің «Алтын сапа» сыйлығы және «Қазақстанның үздік тауары» республикалық көрме-байқауы қатысушыларына беріледі.
Еске салайық, отандық өндіруші «Med365» ЖШС «Қазақстанның үздік тауары» өңірлік байқау-көрмесінде «Өндірістік мақсаттағы үздік тауар» номинациясы бойынша жеңімпаз атанды.
Med365 компаниясы елімізде құрылғылар әзірлеуші және жалғыз отандық өндіруші болып табылады. Қазақстан Республикасы Денсаулық сақтау министрлігіне қарасты Дәрілік заттар мен медициналық мақсаттағы бұйымдар ұлттық орталығы қондырғыны ерекше мұқият тексерді. Қызмет басталғаннан бері еліміздің ірі өндірістік нысандарында жүздеген аппараттар орнатылып, сыналды. «MED365» жобасы – медициналық қызмет көрсету саласында инновациялық технологияларды енгізудің жарқын мысалы.
«Қазір импортты алмастыру өзекті болып отыр – отандық тауар өндірушілер үшін жаңа мүмкіндіктер ашылып, өткізу нарығының үлкен сегменттері босап жатыр. Қазақстандық нарық өндірістерді жаңғырту және олардың тиімділігін арттыру, инновацияларды енгізу және өндірілетін тауарлардың сапасын жақсарту жолымен отандық тауарлардың бәсекеге қабілеттілігін арттыруға бағыт алды. Сондықтан «Қазақстанның үздік тауары, «Алтын сапа» байқауларын өткізу, «Іскер» сыйлығының болуы бүгінгі күні өзекті болып отыр. Тұтынушыға әр салада шетелдік аналогтарға қарағанда сапалы әрі сенімді өнім (қызмет көрсету) жасай алатын лидерлердің бар екенін жеткізу маңызды», – деді «Med365» компаниясының директоры Шыңғыс Құлахметов.
Lanzhou тез тамақтану желісі биыл «Алтын сапа» сыйлығына қатысты. Компанияның миссиясы – бірегей рецепт бойынша дайындалған кеспеге деген сүйіспеншілік арқылы әлемді біріктіру және әлемге Қазақстанды таныстыру. Компания төрт жыл ішінде 36 нүктеге дейін өсті.
«Біз «Іскер» сыйлығын алдық. Бұл – біздің компания үшін үлкен марапат. Жұмылып, команда болып жеткен жетістік. Менің ойымша, команда біздің еңбегіміздің еленгенін естіп, өте риза болады. Бізде қанша адам жұмыс істейді, процесті үздіксіз жақсартып жатырмыз. Осындай еңбек арқылы сыйлықты иелендік. Байқауға бірінші рет қатысып жатырмыз», – деп бөлісті Lanzhou тез тамақтану желісінің бас директоры Гүлбану Майғарина.
Айта кетейік, 2021 жылғы сапа саласындағы ТМД сыйлығының лауреаттары болып «КЕЛЕТ» акционерлік қоғамы (сумен жабдықтау, жылыту және желдету үшін жабдықтарды өндіру және сату), «KSP Steel» ЖШС Павлодар филиалы (металл құбырлар мен оларға муфта өндіру), «НС Элита орталығы» ЖШС (полиграфиялық қызметтер) марапатталған.
«Премия жыл ішіндегі жұмысымыздың қорытындысы, клиенттер арасында танымал болуы, демек кәсіпорын дұрыс бағытта дамып жатыр дегенді білдіреді. Біз жоғары сапа көрсетуге тырысамыз», – деді «Келет» АҚ бас директоры Александр Папп.
Пікір қалдыру:
Пікірлер: